Obamak abantaila txikiari eusten dio, azken inkestaren arabera

Barack Obama presidente eta hautagaiak Mitt Romneyri ateratzen dion abantaila txikiari eusten dio Reuters/Ipsos enpresak egindako azken inkestaren arabera. Datuei begiratuta, Obamak botoen % 48 lortuko du eta Romneyk, berriz, % 47.

Larunbateko datuekin alderatuta, azken inkesta honek bateko igoera ematen die bi hautagaiei; hau da, botoa nori eman erabaki ez dutenen kopuruak behera egin du hauteskundeetarako bi egunen faltan.

Inkesta egiteko 3.805 pertsonari galdetu diete, guztiek botoa emateko asmoa dutenak. Errore-maila 3,4 puntukoa da.

Kanpainako azken orduak

Barack Obama demokrata eta Mitt Romney errepublikanoa AEBetako presidentetzarako hautagaiak hauteskundeetan garaipena lortzeko erabakigarriak izan daitezkeen estatuetan bisita laburrak ari dira egiten.

Zalantzati diren estatuak Ohio, Wisconsin, Iowa, Virginia eta Nuevo Hampshire dira, ez baitute ohiko alderdi batekiko zaletasunik ezarrita. Bertako botoak lortuz gero, litekeena datorren azaroaren 6an Etxe Zuriko egoiliar berria izatea lortzea.

'Agindutakoa bete barik'

Barack Obamak adierazi duenez, Etxe Zurira heldu denetik, 5,5 milioi lanpostu sortu ditu, atzerriko petrolioarekiko menpekotasuna murriztu du, Irakeko gerra amaitu da, AEBetako tropak 2014an Afganistanetik aterako dira eta Al Kaida inoiz baino ahulago dago Osama Bin Laden talde terrorista honen burua hil zutenetik.

Romneyk, berriz, agindutakoa bete ez izana, defizita bikoiztea, "Obamacare" osasun planan zentratzea eta Kongresuan errepublikanoekin lan egin ez izana egotzi dio Obamari.

RealClearPolitics webguneak egindako inkestaren arabera, Obamak botoen gehiengoa lortu dezake Ohio, Colorado, Iowa, Nevada, Wisconsin eta Hampshire Berria estatuetan; Romneyk, berriz, Floridan, Virginian eta Ipar Karolinan.

Karpa berezietan eta internet bidez bozkatu ahal izango da

Sandy ekaitzagatik kaltetutakoek internet bidez bozkatu ahal izango dute New Jerseyn eta New Yorkekoek karpa berezietan eman ahal izango dute boza astearteko hauteskundeetan parte hartzeko.

1.500.000 etxebitza eta enpresa elektrizitaterik gabe daude eta hautesleku asko urez gainezka daude oraindik, horregatik, New Yorkeko eta New Jerseyko agintariek erronka berria dute aurretik.

Parte hartzea gutxitzen bada, ziurrenik ez du emaitzetan eraginik izango, izan ere, bi estatuak demokraten esku egon ohi dira. Hala ere, Obamaren aldeko boto guztien kopuruan eragina izan dezake.

New Jerseyn, "Sandy"rengatik euren etxeetatik joan behar izan dutenek atzerritarrek bezala bozkatu ahal izatea erabaki dute, era honetan, fax edo posta elektroniko bitartez eman dezakete boza.