Musika eta isiltasuna Santiagoko tren-istripuko biktimei agur esateko

Bonavaleko hilerrian (Santiago) omenaldi hunkigarria egin diete duela astebete Santiagon izandako tren-istripuko biktimei.

Musika eta isiltasuna protagonista izan dira ekitaldian,  eta larrialdietako langileen eta Angrois auzoko bizilagunen ekintza aitortu da.

Ekitaldia Galiziako Parlamentuak, Batzordeak eta Udalak antolatu dute. Bertan Alberto Nuñez Feijoo Xuntako presidentea, Pilar Rojo Ganbera legegileko presidentea, Samuel Juarez Galiziako Gobernuko ordezkaria eta Angel Curras Santiagoko alkatea izan dira.

Politikako, kulturako, hezkuntzako eta Galiziako gizarte zibileko ordezkariak ere izan dira. Xose Manuel Budiño gaita-jotzaileak abesti bat jo du, ekitaldia irekiz, tragediaren biktima guztien ohorez.

Zalantzarik gabe, bizi izan den unerik gogorrenetako bat biktimen bozeramaileen eta Angoris auzoko bizilagunen hitzaldiak izan dira.

María Esperanza Valle Pereirak bere bikotekidea galdu zuen istripuan, eta ekitaldira joan direnei eskerrak eman dizkie. "Tragediaren aurka errebelatzen gara", adierazi du.

"Egia jakin nahi dugu, zergatik pasatu zen esan diezaguten; baina ez dugu mendekua bilatzen, guretzako bakea eta joan direnentzako memoria baizik", azaldu du. Esperanza Vallereren hitzak honako hauek izan dira: "istripua saihestu egin zitekeela egia bada, ez errepikatzen saiatu".