Gizartea -
Koronabirusa
Lau kasu gehiago aurkituta, 16 positibo antzeman dituzte Gipuzkoako egoitzetan
Azken orduetan lau positibo berri antzeman dituzte Tolosako Iurramendi zahar-etxean. Ostiralean beste lau antzeman zituzten egoitza berdinean. Bestalde, Gasteizen, 95 urteko emakume bat hil da.
Agentzia | Erredakzioa
Tolosako Iurramendi zahar-etxean lau positibo berri antzeman dituzte azken orduetan. Ostiralean beste lau antzeman zituzten egoitza berdinean. Guztira, 16 koronabirus kasu dira Gipuzkoako egoitzetan.
Eider Mendoza Aldundiko bozeramaileak ohar batean jakinarazi duenez, lau kasu berri horiekin, Iurramendik zortzi positibo ditu dagoeneko. Bestalde, Eibarko Egogain egoitzak gaixo bakarra du.
Era berean, pertsona desgaituentzako egoitzetan beste zazpi kasu gehiago daude: sei Hondarribiako Uliazpi egoitzan, eta bakarra Donostiako Berriz 1 zentroan.
Gipuzkoako egoitzetan antzemandako kasuetatik hiru ospitaleratu behar izan dituzte, "osasun egoera makalagatik".
"Egiten ari diren lan guztiagatik" egoitzetako profesionalei eskerrak eman dizkie Eider Mendozak, baita familiei ere, "testuinguru zailean elkar ulertzeagatik eta lankidetzagatik".
Emakume bat hil da Araban
Bestalde, Arabako Foru Aldundiak aditzera emandakoaren arabera, 95 urteko emakume bat hil da Ajuria zaharren egoitzan, Gasteizen, COVID-19aren ondorioz. Hildakoak bestelako gaixotasun batzuk zituen.
Emakumeak positibo eman zuen koronabirusagatik, eta egoitzan bertan artazten ari ziren. Ajuria egoitza Arabako Gizarte Ongizate Institutu sarearean barruan dago.
