Gizartea -
Koronabirusa
Urkulluk COVID-19aren pandemiaren aurrean guardia ez jaisteko eskatu die gazteei
Hainbat gazte-elkartetako ordezkariekin izandako topaketan, lehendakariak nabarmendu du ezin dela suntsitu "banako eta taldeko ahalegin handia eginez lortutako guztia".
Agentziak | Erredakzioa
Iñigo Urkullu lehendakariak koronabirusaren pandemiaren aurrean guardia ez jaisteko eskatu die gazteei, ez suntsitzeko "banako eta taldeko ahalegin handia eginez lortutako guztia".
Hainbat gazte-elkartetako hogei bat ordezkarirekin batzartu da Urkullu, Bilbon, ostiral honetan. Lehendakariak eskerrak eman dizkie, konfinamenduan boluntario gisa duten konpromisoari eutsi baitiote.
Ekitaldian, erakundeetako beste ordezkari hauek ere izan dira: Beatriz Artolazabal Enplegu eta Gizarte Politiketako sailburua, Marcos Muro Enplegu eta Gazteriako sailburuordea eta Maialen Olabe Euskadiko Gazteriaren Kontseiluko presidentea.
Hogei bat gazte-elkarte ere izan dira topaketan; besteak beste, Junior Enpresetako Euskal Federazioa, Ajebask, Euskal Herriko Eskautak, Novia Salcedo Fundazioa, Kale Dor Kayiko, Erasmus Student Network, EuskarAbentura Espedizioa edo EHUko Ikasle Kontseilua.
Urkulluk, bere hitzaldian, adierazi du Eusko Jaurlaritza lanean dabilela, hainbat programa berriro bideratu eta aktibatzeko; tartean, gazte-sartzerako prestakuntza, hezkuntza-mundutik lan-mundurako trantsizioa, edo toki- eta eskualde-planen sustapena, gazteentzako kuotekin.
Gazteentzako "protagonismoa", Enplegurako Planean
Testuinguru horretan, Marcos Murok zehaztu du gazteek "protagonismoa" izango dutela Eusko Jaurlaritza prestatzen ari den Enplegurako Planean; COVID-19aren ondorioei aurre egitea du helburu plan horrek, eta, guztira, 2020an 175 milioi euroko inbertsioa ekarriko du. 2024an, horren esanetan, 1.670 milioi euroko inbertsioa ekarriko du.
Maialen Olabe Euskadiko Gazteriaren Kontseiluko presidenteak neurriak hartzea eskatu dio lehendakariari, gazteek "bizitza-proiektua garatzeko aukera izan dezaten, modu egokian", pandemiak eragindako krisiaren ostean.
Enpleguari dagokionez, Maialen Olabek aldeztu du "berebiziko garrantzia" eman diezaiotela sortu ahal diren lanpostuen kalitateari, lan-sartzea hobetu ahal izateko.
