Gizartea -
Koronabirusa
Gasteizko Sagartoki jatetxeko sukaldaria hil da, koronabirusagatik
Aurreko astean, 15 kasu atzeman zituzten establezimendu horrekin lotuta. Sagartoki jatetxeko lankideek nabarmendu dutenez, "lankide aparta zen, eta gauza guztiak ilusio handiz egiten zituen".
Agentziak | Erredakzioa
Gasteizko Sagartoki jatetxeko sukaldaria hil da koronabirusagatik, "birus krudel horren aurka borrokatu ostean", haren lankideek Facebook bidez zabaldutako mezu batean jakinarazi dutenez. Aurreko astean, 15 kasu atzeman zituzten establezimendu horrekin lotuta.
"Gaurkoa oso egun zaila da Sagartokiko lantaldearentzat. Moha maiteak utzi gaitu, birus krudel baten aurka borrokatu ondoren. Beti gogoratuko dugu langile aparta eta pertsona hobea zela; bere ahaleginarekin eta konstantziarekin enpresa haztea lortu baitzuen", irakur daiteke jatetxeak sare sozial horretan idatzi duen testuan.
Aurreko astean, abuztuaren 8tik 10era bitartean Sagartoki jatetxean egon ziren pertsonei PCR probak egiteko eskatu zien Osasun Sailak, koronabirusarekin kutsatuta zeuden ala ez jakiteko.
Izan ere, 15 kasu atzeman zituzten agerraldi horrekin lotuta. Jatetxeko sukaldariak positibo eman zuen, eta ostegunean hil zen.
"Lankide aparta zen, eta gauza guztiak ilusio handiz egiten zituen. Hutsune handia uzten duzu gure taldean. Beti egongo zara gurekin, ez zaitugu inoiz ahaztuko eta", idatzi dute haren lankideek Facebooken.
