Itxi

2021/04/29

13:36

Gizartea

KORONABIRUSA

49 pertsona hil dira Euskadin azken zazpi egunetan covid-19aren ondorioz

Naiara Ballesteros | EITB MEDIA

Intzidentzia metatua (537) eta R0 (0,97) jaitsi dira berriro, baina positibo berrien kopurua (876) eta ZIUen presioa apur bat handitu dira. Araba eta Gasteiz eremu gorritik atera dira.

1:27
Intzidentzia metatuaren bilakaera. EITB Mediaren bideo batetik ateratako irudia.
  • Whatsapp
  • Whatsapp
  • Telegram
  • Bidali

Azken astean, EAEn 49 pertsona hil dira (aurreko astean baino 17 gehiago) covid-19aren ondorioz, eta 876 positibo berri atzeman dituzte azken orduetan, baina kasuen intzidentzia-tasa metatuak behera egin du bigarren egunez jarraian, eta 100.000 biztanleko 537,89 kasu izan dira 14 egunetan.

400 kasuko intzidentzia-tasa metatutik behera, Araba (397,93) eta Gasteiz (398,25) gune gorritik atera dira.

Intzidentziak behera egin du pandemiaren arrisku handiko eremuan jarraitzen duten beste bi lurraldeetan ere: Bizkaian 456,38 kasu dira azken 14 egunetan, eta Gipuzkoan 714,68.

Intzidentzia metatuaren bilakaerari buruzko datu onarekin batera, oinarrizko birsorkuntza-tasarena dugu, 0,97ra jaitsi baita (1,00 zen asteartean), hau da, gaixo batek jada ez du beste pertsona bat kutsatzen, eta egoera hori Euskadin ez zen martxoaren 10etik gertatzen.

Bizkaia bakarrik iristen da 1era. Arabak izan du bilakaerarik onena adierazle horretan (0,9), eta ondoren Gipuzkoak (0,95).

Gainera, intzidentzia-tasen arrazoia (egungo 14 egunetan metatutako intzidentzia-tasa duela astebetekoarekin alderatzen duena) ere jaitsi egin da asteazken honetan, eta 1,01ekoa da Euskadi osoan (1,04 asteartean).

Hain positiboak ez diren datuen artean, ospitaleko presioa dago, nahiz eta asteazkenean 7 pertsona gutxiago ospitaleratu dituzten.

Nabarmentzekoa da zainketa intentsiboetako unitatean paziente kritikoen kopurua: 192 ohe daude okupatuta, aurreko egunean baino zortzi gehiago, eta 83 ospitaleratze berri erregistratu dituzte gela arruntetan, asteartean baino 16 gutxiago; hau da, 527 pertsona daude ospitaleratuta gela arruntetan.

Apirilaren 19tik 25era bitartean koronabirusak eragindako heriotzen kopurua, aurreko astean baino 17 gehiago, otsaileko azken astetik izandako altuena da, orduan 51 pertsona hil baitziren.

Eusko Jaurlaritzako Osasun Sailak ostegun honetan emandako datuen arabera, joan den asteazkenean 11.986 proba diagnostiko egin zituzten, aurreko eguneko 12.137 proben azpitik, eta 876 positibo eman zituzten, hau da, aurreko egunean baino zazpi gehiago. Horrela, frogen positibotasun tasa hamarren bat igo da, % 7,2tik % 7,3ra.

Lurraldez lurralde aztertuta, 412 kasu positibo atzeman dituzte Bizkaian asteazken honetan, asteartean baino zazpi gehiago, 386 Gipuzkoan (30 gehiago), eta 70 kutsatze berri Araban, aurreko egunean baino 28 gutxiago. Horiei zortzi positibo gehitu zaizkie, Euskal Autonomia Erkidegotik kanpo bizi diren pertsonen artean.

Datu horiekin, Euskadin metatutako intzidentziak behera egin du, bezperako 540,8 kasuetatik asteazken honetako 537,8ra. Bi egun jarraian jaisten den lehen aldia da, martxoaren 11n igotzen hasi zenetik gertatzen ez zena.

Araban 400 kasu izan dira 100.000 biztanleko, eta horrela jarraituz gero, asteartean itxitura perimetraletik aterako litzateke. Zehazki, 397,9 kasu daude, eta aurreko egunean, berriz, 410.

Hiriburuen artean, Gasteiz ere muturreko kutsatze-arriskutik atera da, eta azken egunetako beheranzko joera berretsi du, 398,2 kasu izan baitira 14 egunetan.

Bilbok ere behera egin du, 566,8 kasu izan baitira, baina Donostiak goranzko joerari eutsi dio, 100.000 biztanleko 624,4 kasu izan baitira 14 egunetan.

Hezkuntza arloan, Azkoitiko (Gipuzkoa) Bizilore Eskola Aktiboa zentroak (38 ikaslerekin) itxita jarraitzen du.

Arabako ikastetxe gehienak aste honetan San Prudentzio ospakizuna dela-eta jarduerarik gabe daudenez, egunotan Hezkuntza Sailak Bizkaiari eta Gipuzkoari buruzko informazioa baino ez du ematen.

Hortaz, ostegun honetan 130 ikasgela itxi dituzte, asteartean baino 2 gutxiago, (Hezkuntza Sailak ez zuen atzo ikastetxeei buruzko daturik eman), bi lurralde horietako 84 ikastetxetan, 7 gutxiago. Eskola horiek Bizkaiko eta Gipuzkoako 14.779 ikasgelen % 0,87 dira.

Nafarroako egoerari dagokionez, 181era igo dira kutsatzeak Foru Erkidegoan.

Kontuan izan osasun agintariek koronabirusaren aurrean eman dituzten aholkuak. Gaitzaren sintomarik baduzu, EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, berriz, Osasun Batzordearen telefonora dei dezakezu: 948 290 290. Gogoratu covid-19a ez hedatzeko modurik eraginkorrena musukoa erabiltzea, espazioak aireztatzea, segurtasun-distantzia gordetzea eta eskuak sarri garbitzea dela.
  • Bisitatuena

      Kargatzen ikusiena
      Kargatzen ikusiena
    ;