Mallorcako agerraldiarekin lotutako kasuen igoeraren ondoren, datuek behera egin dute berriro, eta duela astebete erregistratutakoen (161) azpitik kokatu dira.
Larunbat honetan 145 kasu berri diagnostikatu dituzte Euskal Autonomia Erkidegoan, aurreko eguneran baino 63 gutxiago. Proba diagnostikoei dagokienez, positiboen tasa % 3,1ean mantendu da, bezperakoaren antzera ( % 3,2).
Eusko Jaurlaritzako Osasun Sailak jakitera eman dituen datuen arabera, 4.656 PCR eta antigeno test egin zituzten atzo eta positiboek behera egin zuten hiru lurraldeetan. Jaitsiera handiena Gipuzkoan izan da, 43 kasu zenbatu baitituzte, aurreko egunean baino 47 gutxiago. Bizkaian 83 positibo diagnostikatu zituzten, bezperan baino 8 gutxiago, eta Araban 13, bost gutxiago. Gainera, Euskal Autonomia Erkidegotik kanpo bizi diren bi pertsonarengan ere diagnostikatu zuten birusa.
Mallorcako agerraldiarekin lotutako kasuen igoeraren ostean (126 baieztatu dituzte EAEn ostiralera arte), datuek behera egin dute berriro, eta azken igandean (161) eta duela bi aste (203) argitaratutakoen azpitik daude.
Bestalde, 35 paziente daude une honetan EAEko ZIUetan, aurreko egunean baino bat gehiago, baina ospitaleratze berriak 7ra jaitsi dira.
Astelehenean emango da udalerriei buruzko informazioa eta R0 indizearen berri.
37 kasu atzeman dituzte Nafarroan, azken egunetako bide beretik
Covid-19 kutsatze datuek bere horretan jarraitzen dute Nafarroan. Ostiralean 34 positibo berri detektatu bazituzten, atzo, larunbata, 37 pertsonak eman zuten positibo.
948 proba diagnostiko egin zituen Osasun Sailak (PCR eta antigeno testen artean) egunean zehar, eta horien % 3,9k eman zuten positibo (bezperan % 2,6k) Nafarroako Gobernuaren datuen arabera.
Kontuan izan osasun agintariek
koronabirusaren aurrean eman dituzten aholkuak. Gaitzaren sintomarik baduzu, EAEn bizi bazara,
osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri:
900 20 30 50. Nafarroan bizi bazara, berriz, Osasun Batzordearen telefonora dei dezakezu:
948 290 290. Gogoratu covid-19a ez hedatzeko modurik eraginkorrena musukoa erabiltzea, espazioak aireztatzea, segurtasun-distantzia gordetzea eta eskuak sarri garbitzea dela.