Gizartea -
Koronabirusa
Osakidetzak txertoa hartzera animatu ditu oraindik hitzordua eskatu ez duten herritarrak
Sentsibilizazio-kanpaina, lehen dosia jaso duten ondorengo adin-tarteei zuzenduta dago: 16 eta 19 urte bitarteko gazteei (% 48,2), 20 eta 29 urte bitartekoei (% 53,7) eta 30 eta 39 urte bitartekoei (% 72,6).
Agentziak | EITB Media
Oraindik hitzordurik eskatu ez duten 16 eta 39 urte bitarteko herritarrei covid-19aren aurkako txertoa hartzeko deia egin die Osakidetzak, Eusko Jaurlaritzako Osasun Sailak ostiral honetan jakitera eman duenez.
Mugikorretara bidalitako mezuen bidez, gazteen artean koronabirusaren aurkako txertaketa bultzatzea du helburu kanpaina horrek, une honetan txertaketa-kanpainaren egutegian hitzordua hartzeko data ugari eskuragarri baitaude, eta dosi nahikoak dituzte horretarako.
Osakidetzak martxan jarri duen sentsibilizazio-kanpaina, dagoeneko lehen dosia jaso duten ondorengo adin-tarteei zuzenduta dago: 16 eta 19 urte bitarteko gazteei (horien % 48,2k jaso dute jada lehen dosia), 20 eta 29 urte bitartekoei (% 53,7k jaso dute lehen ziztada) eta 30 eta 39 urte bitartekoei (% 72,6k).
Aipatutako hiru adin-tarte horietan, immunitate osoa dute gazteen % 12,5ek, % 25,5ek eta % 59,8k, hurrenez hurren.
Osasun Sailak jakitera eman duenez, 12 urtetik gorako hamar euskal herritarretik zortzik gutxienez covid-19aren aurkako txertoaren dosi bat jaso dute jada, eta Euskadiko herritarren % 73k bi dosuak jaso dituzte dagoeneko.
