Itxi

2022/01/12

21:17

Gizartea

Indarkeria matxista

Sara zuen izena, eta ez da kasu bakana izan

EITB Media

Indarkeria matxistaren biktimak ez dira zerrenda hotz batean gehitzen diren datu anonimoak. Tuteran hildako emakumeak izen-abizenak zituen, eta hainbat proiektu etorkizunerako.

  • Iruñean egindako elkarretaratzea. Argazkia: EFE

    Iruñean egindako elkarretaratzea. Argazkia: EFE

  • Whatsapp
  • Whatsapp
  • Telegram
  • Bidali

Tuteran ustez senarrak hil duen emakumea indarkeria matxistaren aurtengo lehen biktima da. Emakume hori, baina, ez da datu estatistiko hutsa: izen-abizenak zituen, Sara Pina hain zuzen ere, eta "proiektu asko" etorkizunean egiteko. Irakaslea zen, eta antzerkia gustuko zuen.

"Oso adeitsua zen, hezibide onekoa, oso zuhurra. Benetako artista eszenatokian", adierazi du Fernando Sierrak, Cortes herriko alkateak, Radio Euskadin. Sara bertakoa zen, bertan bizi ez zen arren, baina herri horretako antzerki taldean aritzen zen. "Maite egiten zuen herria", erantsi du Sierrak.

Astelehenetik bai Cortesen, bai Tuteran, izan diren gaitzespen elkarretaratzeetan ere denak izan dira hitz onak; oso maitatua zen bi herrietan.

Sara (38 urte) irakasle zen Castejongo Maiatzak Bi ikastetxean, eta hezkuntzaren arloan egin duen lana ere goratu dute: "Bokazio handikoa zen; zerbitzari publikoa".

Indarkeria matxista kasuak ez dira bakanak, estrukturalak baizik: azaroan, 1.144 indarkeria kasu "aktibo" zeuden Nafarroan, eta 619 emakumek Poliziaren babesa behar zuten.

2003tik, 1.126 emakume hil dituzte bikotekideek edo bikotekide ohiek Estatuan, Espainiako Gobernuaren datuen arabera.

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak eta/edo deitu doako telefono hauetara: 900 840 111 (EAEkoa), 016 (Espainiako Estatukoa) edo 3919 (Iparraldekoa, eguneko 24 orduetan erabilgarri, igande eta jaiegunetan 09:00etatik 18:00etara izan ezik). Ez dute fakturan arrastorik uzten, baina bai telefonoan. Beraz, ez ahaztu ezabatzea.
  • Bisitatuena

      Kargatzen ikusiena
      Kargatzen ikusiena
    ;