Europako hauteskundeak 2019: maiatzaren 26ko hauteskundeei buruko albisteak | EITB Europako Parlamenturako hauteskundeak

Europakoak

08:17

Europakoak

Maiatzak 25

Gauerdian hasiko da Europako hauteskundeetarako kanpaina

Erredakzioa

Zortzigarren legealdirako ordezkariak aukeratuko ditugu aurtengoan, 751 guztira. Espainiako Estatuari 54 dagozkio, eta Frantziakoari 74.

2:03
  • Whatsapp
  • Whatsapp
  • telegram
  • Bidali

Europar Batasuneko herrialde guztietan, gauerdian hasiko da hauteskunde kanpaina, maiatzaren 25eko hauteskundeei begira. Ohi denez, euskal alderdi nagusiek ere iluntzean egingo dituzte kanpainari hasiera emateko ekitaldiak.

Zortzigarren legealdirako ordezkariak aukeratu behar ditugu aurtengoan, 751 guztira. Espainiako Estatuari 54 dagozkio, eta Frantziakoari 74.

Orain arte ez bezala, hauteskunde horietako emaitzak eragin zuzena izango du Europako Batzordeko presidentea aukeratzeko orduan.

Euskadin eta Nafarroan soilik aurkeztuko direnez, EAJk eta EH Bilduk 240.000 boto inguru lortu beharko dituzte Hego Euskal Herrian Europan eserlekuren bat eskuratu ahal izateko. Horregatik koalizioak osatu dituzte Galiziako, Kataluniako edota Kanarietako alderdi abertzaleekin. Egunero egingo dituzte mitinak eta bestelako ekitaldiak.

EAJk CiUrekin eta Coalición Canariarekin egin du ituna, eta Izaskun Bilbao jeltzalea koalizio horretako bigarrena izango da , Ramon Tremosaren atzetik.

Euskal Herria Bilduk Galiziako BNGrekin osatu du zerrenda, eta horren buru Josu Juaristi euskalduna izango da.

PP, PSOE, IU eta UPyD estatu mailako alderdiek, ordea, ekitaldi xumeagoak egingo dituzte Euskadin, eta biztanle gehien dituzten erkidegoetara joko dute bereziki boto eske, Espainiako Estatuak barruti bakarra osatuko baitu Europako hauteskundeetan.

Kanpainari hasiera emateko ekitaldiak

Kanpaina ofiziala gauerdian hasiko da. EAJko zerrendaburua Urduñan izango da goizean, eta 22:00etan Hondarribian egingo dute kanpaina hasierako ekitaldia. EH Bilduk Iruñean hasiko du kanpaina, San Frantzisko plazan, 19:00etan.

Ramon Jauregi eta Eider Gardeazabal hautagai sozialistak 21:00etan hasiko dute hauteskunde kanpaina, Bilbon. PPk Carlos Iturgaiz izango du gaur Gasteizen, UPyDk Bilbon egingo du ekitaldia, 19:30ean, eta Ezker Anitzak ere Bilbon hasiko du bere kanpaina, 20:00etan. Azkenik, Vox alderdi berriak Gasteizen hasiko du hauteskunde kanpaina, Alejo Vidal-Quadras zerrendaburuaren mitin batekin, eta Jose Antonio Ortega Lara eta Santiago Abascal alderdikideak ere bertan izango dira.

Estatuko ekitaldi nagusiak

Estatuko alderdiek ere ekitaldi bereziak egingo dituzte gaur, kanpainari hasiera emateko. Gauerdian, Madrilgo egoitzan, Miguel Arias Cañete PPren zerrendaburua eta Esperanza Aguirre Madrilgo PPko presidentea izango dira.

PSOEk Villaverden (Madril) hasiko du bere kanpaina. Besteak beste, Elena Valenciano hautagaia, Alfredo Perez Rubalcaba eta Tomas Gomez arituko dira bertan.

Izquierda Unidak ere Madrilen ekingo dio bere kanpainari, Conde de Barajas Plazan, Willy Meyer zerrendaburuarekin eta Cayo Lara alderdiko koordinadorearekin.

Azkenik, UPyDk Francisco Sosa Wagner eta Maite Pagazaurtundua izango ditu hasierako ekitaldian, Madrilgo Alcala Atean.

Iruzkinak

  • Publizitatea
    • BILATZAILEA

    orain albiste

    Albiste gehiago

    Publizitatea
    Publizitatea
    Publizitatea

    Bisitatuena

      Kargatzen ikusiena
      Kargatzen ikusiena