Casado: 'PPk EAEn hauteskundetara aurkezten jarraituko du, nahiz eta simaurra bota'

"Ezker abertzalea gobernatzen duenean penagarria da", ohartarazi du Andoni Ortuzar EAJko presidenteak astearte honetan. "Beste kala batzuetan arrantzatu" nahi izatea leporatu dio jeltzaleak koalizioari, "boto ezker espainolistaren bila".

"Abertzalearena ezabatzen dute beste kala batzuetan arrantzatu nahi dutelako. Orain Podemosen desengainu bozen bila doaz, boto ezker espainolistaren bila", adierazi du Ortuzarrek Bermeon (Bizkaia).

EAJ boto "erreakzionario eta unionistekin gizentzen" ari dela esan zuen Arnaldo Otegi EH Bilduko koordinatzaile nagusiak. Adierazpenak errefusatu ditu Euzkadi Buru Batzarreko presidenteak.

Arnaldo Otegi EH Bilduko koordinatzaile nagusiaren hitzetan, "EH Bildurena burujabetzan sakontzeko eta jendearen bizi baldintzak hobetzeko boto baliagarria da".

Markina-Xemeinen (Bizkaia) ekitaldi politikoa egin du koalizioak. Testuinguru politikoan bi bloke handi nagusitzen ari direla nabarmendu du Otegik: "alde batetik, bloke kontserbadorea dugu, EAJ buru duena, haren helburu bakarra botorik kontserbadoreena bilatuz boterean mantentzea da, eta bestetik, bloke progresista dago, EH Bildu buru duena, jendea eta jendearen lehentasunak artatzen, defendatzen eta zaintzen dituena".

EAJ egiten ari den kanpainarekin kezkaturik agertu da EH Bilduko buruzagia: "Egunero eraso egiten eta iraintzen digute, gezurretan ari dira. Casadoren eta Riveraren estilo berdinarekin ari dira, lekukoa hartu dietela ematen du".

Koalizio morea "batzuen gogoz bestera" euskal politikara 2015ean "gelditzeko heldu" zela gogorarazi dio Lander Martinez Podemos Euskadiko idazkari nagusiak Arnaldo Otegi EH Bilduko buruzagiari.

Datorren hauteskundeetarako "menua bi platerera" murriztu zuen Arnaldo Otegik iragan asteburuan: koalizioa abertzalea eta EAJ, bere hitzetan, gainerako aukerak "garnizioa" direlako. Martinezek EH Bilduko koordinatzaile nagusiari erantzun dio gaur Arrasaten (Gipuzkoa).

"Adi, nahiz eta buelta asko eman, nik ez dut menu hori ikusten. Bietako bat, jatetxe desberdinetara goaz ala Otegi jaunak ez ditu betaurrekoak graduatu 2015etik", adierazi du Martinezek. Udal eta foru hauteskundeen ostean, "politika progresistak eginez gobernatzeko asmoa duenak Elkarrekin Podemos aintzat hartu beharko du", erantsi duenez.

Denis Itxaso Gipuzkoako ahaldungai sozialistak (PSE-EE) legealdi honetan Irungo udal Gobernuan gertatutakoa hizpide izan du. Itxasoren ahotan, EAJk alkate sozialistei dien "nazkak" Aldundia zuzentzeko  baliogabetzen du.

Zentzu horretan, "alkateen agiriari begiratu gabe" lan egingo duela agindu du PSE-EEko hautagaiak. Markel Olanori "ahaldun nagusiaren jaka handi geratzen zaio", azpimarratu du Itxasok. "Guztien ahaldun nagusi bat behar dugu", errepikatu du.

PSE-EEk hauteskunde ekitaldia egin du Irunen. Jose Antonio Santano bertako alkate eta alkategaia lagun izan du Itxasok. Sozialistak ez dira "sektarioak" eta "alkateen agiriaren koloreari begiratu barik" lan egingo dute, agindu duenez.

Azkenik, Pablo Casadok PPko presidenteak Bilbon ziurtatu duenez, bere alderdiak Euskadin, Nafarroan eta Katalunian hauteskundetara aurkezten jarraituko du, nahiz eta "simaurra" bota eta "eskratxeak" egin. "Espainian askatasun falta oraindik bistakoa da",  adierazi du, batez ere, "logotipo zehatz bat eta gertatzen ari dena salatzen baduzu". Gainera, "Estatuak bere presentzia estafetako Correosera murriztu duen" lekuetara joaten jarraituko dutela esan du, "Espainiako nazioa sendotzeko".

Bizkaiko PPren ekitaldi politikoan parte hartu du Casadok Bilbon. Alfonso Alonso Euskadiko PPren presidenteak eta Javier Zarzalejos, Raquel Gonzalez eta Amaya Fernandez Europako Parlamenturako hautagaiak, Bilboko alkategaiak eta Bizkaiko ahaldungai nagusiak, hurrenez hurren, lagundu dute.

Casadoren ahotan, Sanchez "Espainiako historiaren presidenterik erradikalena da, moderazioz mozorroturik badago ere". "Hemen ez da ezer gertatzen, moderatuz mozorroturik nahiko du jendeak botoa ematen jarraitzeko, azkenean erosoen dagoenarekin ituna itxiko du, aurrekontu edo politika bakoitzerako PPrekin hitz egin beharrik gabe", azaldu du.