Intzidentzia tasak gorako bidean jarraitzen du EAEn, eta 326 kasutan kokatu da

Azken 14 egunetako intzidentzia tasa metatuak igotzen jarraitzen du Euskal Autonomia Erkidegoan, eta igande honetan 100.000 biztanleko 326,63koa da.

Positibo tasak, ordea, behera egin du aurreko egunetako datuarekin alderatuta. Igandean % 7,5ekoa da, eta azken bi egunetan % 9tik gora kokatu da. Ospitaleratzeek, bestalde, gora egin dute. 53 pertsona ospitaleratu dituzte azken egunean, eta ZIUetan 95 gaixo daude covid-19arekin.

Osasun Sailak emandako datuen arabera, 6.508 proba diagnostiko egin dira larunbatean guztira (4.620 PCR eta 1.888 antigeno), hau da, ostiralean egindako kopuruaren antzekoa. 491 positibo berri atzeman dira, aurreko eguna baino 33 gutxiago. Positibo tasa % 7,5ekoa izan da.

Lurraldeka, kutsatze berrien artean 87 Araban erregistratu dira, 202 Bizkaian eta 197 Gipuzkoan. Beste 5 autonomia erkidegotik kanpokoak dira.

Positibo tasak behera egin duen arren, ospitaleratze berrien kopuruak gorako bidean jarraitzen du.

Azken egunean 53 pertsona ospitaleratu dituzte, ostiralean baino bost gehiago, eta zaintza intentsiboetako unitateetan 95 gaixo daude covid-19arekin (bi gehiago). Martxo erdialdetik kopururik altuena da.