Gaur hasiko da Maguette Mbeugouren hilketa argitzeko epaiketa, Bilbon

2018ko irailean Maguette Mbeugou emaztea hiltzea egotzita atxilotutako gizona gaur hasiko dira epaitzen, Bilboko Lurralde Auzitegian. Aurretiazko txostenak aurkeztu, eta epaimahaia osatuko duten bederatzi pertsonak aukeratuko dituzte.

25 urteko emakumea labankadaz hil zuten 2018ko irailean Bilbon, bere etxebizitzan, adin txikiko bi alabak bertan zirela, eta haren senarra atxilotu zuten ordu batzuk geroago Mutrikun, hilketa leporatuta.

Maguette Mbeugouk senarraren aurkako salaketa aurkeztu zuen indarkeria matxistagatik, eta urruntzeko agindua ere eskatu zuen, baina epaileek ukatu egin zioten.

Autopsiak baieztatu zuenez, emakumeak 24 ordutik gora zeramatzan hilda haren hilotza aurkitu zutenean. Emakumea hil eta, bi adin txikikoak amaren gorpuaren ondoan utzita, alde egin izana leporatzen diote akusatuari.

Epaiketa urtarrilaren 29an hastekoa zen, baina atzeratu egin zuten. Fiskaltzak eta akusazio partikularrak 25 urteko kartzela zigorra eskatzen zuten orduan, hilketagatik. Horrez gain, akusazio partikularrak beste zortzi urte eskatzen zituen alabak bakarrik uzteagatik, eta beste hiru urte, tratu txarrengatik.