Politika -
Tentsioa Gibraltarren
Londresek Espainiari kexa formala aurkeztuko dio auto-ilarengatik
Miguel Arias Cañete Ingurumen ministroaren hitzetan, Erresuma Batuko Gobernuaren mehatxuen aurrrean Espainiako Exekutiboari "ez dio pultsuak dar-dar egingo".
Erredakzioa
Espainiako agintariei kexa formala aurkeztuko diela iragarri du gaur Erresuma Batuko Atzerri Ministerioak, Gibraltarreko mugako auto-ilarak "onartezinak" direlako.
Miguel Arias Cañete Ingurumen ministroaren hitzetan, Erresuma Batuko Gobernuaren mehatxuen aurrrean Espainiako Exekutiboari "ez dio pultsuak dar-dar egingo". Espainiak "legediaren babesa du", Gibraltarrek hormigoizko blokeak itsasora botatzeko eta delitua egiteko "aldebakarreko" erabakia hartu zuelako, erantsi du.
"Gibraltarreko mugan ikusi diren atzerapen onartezinak direla-eta Atzerri Ministerioaren aurrean protesta egingo dugu", iragarri du Foreign Office-ak.
La Linea de la Concepcionetik (Cadiz) Gibraltarrera doan errepidean auto-ilara luzeak errepikatu dira astearte honetan, kontrolak areagotu dituztelako.
"Jokoa, seta eta partida"
Bestalde, gatazkari irtenbidea aurkitzeko nazioarteko erakundeetara jotzeko "erronka" bota dio Fabian Picardo Gibraltarreko ministro nagusiak Espainiari. Picardoren ahotan, auziak "bidezko nazioarteko auzitegi" baten eskuetan amaitzen baldin badu, Gibraltarrek "jokoa, seta eta partida" irabaziko luke.
Gatazka Nazio Batuen Erakundera edo nazioarteko epaitegietara eramateko eskatu dio Picardok Mariano Rajoyren Gobernuari edo, bestela, hiru aldeko "elkarrizketa politiko" bati hasiera eman.
