Gizartea -
Koronabirusaren semaforoa
Bizkaiko bost udalerri eta Gipuzkoako hiru eremu gorritik irten dira
Basauri, Erandio, Gernika-Lumo, Mungia, Portugalete, Ordizia, Villabona eta Zumaia gorritik laranjara igaro dira. Usurbilek, ordea, ez dio laranjari eutsi, eta eremu gorrira igaro da.
A. S | EITB Media
Basauri, Erandio, Gernika-Lumo, Mungia eta Portugalete, Bizkaian, eta Ordizia, Villabona eta Zumaia, Gipuzkoan, eremu gorritik atera dira, covid-19ak EAEn herriz herri izan duen eragina neurtzeko Eusko Jaurlaritzako Osasun Sailak erabiltzen duen semaforoaren arabera. Usurbilen, ordea, egoerak okerrera egin du, eta eremu laranjatik gorrira igaro da.
Egoera pixkanaka hobetzen ari da EAEn. Azken orduetan 363 positibo berri zenbatu dituzte, aurreko egunean baino 177 gutxiago. Dena dela, gaixo larriak ugaritu egin dira ZIUetan.
Arabak (503 kasu 100.000 biztanleko) eremu gorrian jarraitzen du, baita Gasteiz hiriburuak eta Amurriok ere.
Agurainen egoerak hobera egin du eta laranjatik horira igaro da, Laudiorekin batera. Araban ez dago herririk eremu berdean ezta laranjan ere.
Bizkaia ere (445 kasu 100.000 biztanleko) eremu gorrian dago, Bilbo eta beste 16 herrirekin batera: Abanto-Zierbena, Arrigorriaga, Berango, Bermeo, Derio, Getxo, Gorliz, Güeñes, Leioa, Lekeitio, Markiña-Xemein, Muskiz, Ondarroa, Santurtzi, Sestao eta Sopela.
Balmaseda, Balmaseda, Barakaldo, Etxebarri, Galdakao eta Zornotza laranjan daude, eta azken orduetan Basauri, Erandio, Gernika-Lumo, Mungia eta Portugalete gehitu dira zerrendara.
Horian, bestalde, Abadiñok, Elorriok, Ermuak, Trapagaranek eta Zallak jarraitzen dute, eta gaurtik aurrera baita Durangok eta Ortuellak ere.
Ez dago herri bakar bat ere berdean.
Gipuzkoa (352 kasu 100.000 biztanleko) eremu gorritik kanpo dago, baita Donostia hiriburua ere. Dena dela, oraindik 11 udalerrik jarraitzen dute zerrenda gorrian. Honako hauek dira: Pasaia, Azpeitia, Deba, Eibar, Irun, Lazkao, Legazpi, Mutriku, Oiartzun eta Urnieta. Gainera egoerak okerrera egin du Usurbilen eta eremu laranjara igaro da.
Laranjaz margotuta ageri dira Andoain, Aretxabaleta, Donostia, Hondarribia, Lasarte-Oria, Oñati eta Zarautz, eta gaurtik aurrera, baita Ordizia, Villabona eta Zumaia ere, eremu latzena atzean utzi baitute.
Arrasatek, Astigarragak, Azkoitiak, Beasainek, Bergarak, Errenteriak, Hernanik, Lezok, Oriok, Urretxuk eta Zumarragak horiari eutsi diote, eta Elgoibar eta Tolosa batu zaie.
Ez dago udalerririk eremu berdean.
Europar Batasunak onartutako koloreen mapa egokitu du Jaurlaritzak, eta azken 14 egunetan metatutako intzidentzia-tasaren arabera sailkatzen ditu EAEko udalerriak.
